أصل الحكايه بتلف و تدور ف البلد
ان اللى راح يتلدع
هيكون فارس و يكون شجاع
لكن النهايه مش زى البدايه
و ما فى حد يعرف النهايه غير رب البشر
........................
جرصت(قرصت) ناموسه ودن الواد ,صرخ
بصت امه لابوه و اتبسمت
دلوقت بس اطمنت
ما هى تعرف ان ناموس الكفر ده جاموس
و اللدعه منه علامه ع الرجوله
لفت تزغرد ف الكفر و تقول
انا جبت راجل
انا اللى جبت الولد
..........................
الغيره و الحقد اللى مالى قلوب الحريم انتقل زى الطاعون
و العين بقت ع الواد اللى اتلدع
مسكين لا يدرى انه راح يكون
ضحيه ل خيال ..راكب حصان من نار اندلع
..........................
عدت سنين...
كبر الحليوه اللى اتلدع
و عيون بنات الكفر كلاته عليه راح تنخلع
و هو قلبه سلمه ل بنت الجيران
و اداها مفتاحه و صكوكه من زمااان
.........................
شجرة ليمون طارحه و شاهده ع الغرام ...ع الحب اللى ابتدا
تحت الفروع
وقفت تعاهده انها هتكون سند, هتكون له ام و معاه كمان بنتين و ولد
و حلف لها ان القلب وياها
و ان القيراط اللى حلته راح يكون مهر محياها
شجرة ليمون طارحه ما تعرف ايه مخبى لها القدر
............................
طلقة رصاص.....صوتها يدوى
و الكفر كلاته لملم ولاده و قعد قدام النار بيدعى
طلقة رصاص......من تار قديم
تار استخبى للفتى اللى اتلدع
طلقة رصاص.....رشقت ف كتفه
و جنب قلبه اترستقت
طلقة رصاص....بكت الصبيه و صرخت
حصان بيجرى...تراب....عفاره..هرب الجبان اللى ضرب
و بين ايدين الحلوه ....روحه سلمت للى خالقها...و عنيه اتبسمت
...........................
و من ساعتها...
يتلف ف البلاد صبيه شابه
تحكى
ع الفتى اللى قرصته ناموسه ف ودنه....راح صرخ.
9 comments:
سؤال صغير قد كدهو
هو انتي اللي مألفاها؟!
حلوة "التنين"
انت بتشكك ف قدراتى يا مصعب افندى
اه انا اللى مألفاها امبارح باليل بعد صلاة العشا و قبل التراوييح
ههههههههههههههههههههههههه
جميلة وتلقائية واسلوب جديد مختلف
سيرى يا نورماندى(اميرة) على بركة الله
dondon
حاسس انهامش متناسقة ومش فاهم "انت قصدك بيها حاجة معينة ولا لأ"؟؟
اللي فات كان احسن
بس دي مش موحشة يعني
ونفسي اللي جاي يبقي احسن واحسن
بص يا زيمو
من ناحية انا عايزه منها ايه و ايه الهدف ,دى حاجه انت اللى بتحددها لانها بتختلف من واحد للتانى ,ممكن واحد يشوف انها قصه رومانسه و ممكن واحد يشوف انها قصه بتحكى عن التار و ممكن حد يشوف انها مجرد رمز ل حكايات كتير بتحصل ف البلاد الريفيه و فى النهايه كل واحد ووجهة نظره اكيد لها عندى احترامها و تقديرها
( وبعدين مش عيب عليك نبقى قسم واحد و تعمل معايا كده هههههههههههههههه)
حلوه جوى جوى
بجد جامده
،تحياتى
شكرا ليكى يا عابره
و امنى انك تعبرى من عند مدونتى دايما و تدينى رايك:)
و اتمنى*
احلى حاجه قرتها تسلم دمغك انا بحبك اوي اوي
Post a Comment