وأخيراً.. رجل مهذب

زحاام.. دائما ما تصاب السيارات بحالة من الجنون المطبق كلما وجدوا أنفسهم فوق كوبري
كيف سأعبر؟

الساعة 6:30 .. أعلم أنني تأخرت
لكني لن أجازف بحياتي من أجل الفيلم الأول
لا يهم

الحمد لله... انجاز.. انتهيت من عبور أول مفترق
كلما أنوي العبور تظهر سيارة من الفراغ مصدرة صوت مزعج معبرا عن رأي السائق في طريقة عبوري
قائلاً: انتي مجنوووووووووووووووووونة

من هو؟.. لقد رأيته سابقاً.. كان جالساً يتلقى المكالمات طوال الوقت – بشكل ملفت للانتباه كمواطن يركب ميكروباص قاتل كالذي كنت أركبه- ويؤكد أنه في الطريق، أنه ينظر لي بغرابة
ثم

"ممكن تيجي أنتي الناحية دي أحسن"

وعدينا الشارع

أنا واحده من الشعب!!!

واقفه لوحدى .........
لقتنى فجأه بعلو صورتى عماله اقول
يا شعب فوق
يا شعب قوم

كنتم زمان زى الحجاره...
ع الظلم و الذل بتنحدف
لكن بقيتوا تراب....ف الارض بيدوسوا عليه
و ب اقل نسمه بينجرف

كنتم لسان للحق....
مش ساكتين ع الظلم ابدا
دلوقتى صبح الظلم اقرب صحابكم
و الخرس...زى المرض بيصيبكوا

كنتم بتقفوا ف وش الواحد منهم..
تزعقوا و تنادوا بحقكوا
دلوقتى بتطاطو الروس
شايلين على كتافكوا بلاويهم....و همكوا

كنتم.........
و زى ما بدأت فجأه لقتنى بسكت
قعدت افكر!!!!
هو الشعب ده يطلع مين؟؟؟
انا ليه بتكلم زى ما اكون مش منهم
قلت لنفسى.......ازاى الومهم؟؟
انا ساكته .....و هما كمان ساكتين

يا دلعك يا شروق

جيزه....هرم ..عباااااسيه.....بولاء

ميكروباصات يعنى زحمه و خنقه و بهدله

يعنى عادم و ريحه مقندله

يعنى وسع و اتااااخر و زنق ع اللى جنبك

يعنى ربع جنيه مقطوع و فكه و تتحسبن ع اللى قبلك

سواقيين رايقيين....طول النهار مشغلين كعبوو

و اللى مش عاجبو....اهو ذنبو على جنبو

سايقيين اتآرى و اللى راكب حاطط ايده على بطنه

خايف ف مره يكون واكل زياده...و يهضم ع اللى جنبه

و الناس عايزه تقضى مصالح و تروح بيتها و لو بالضرب

و المضطر لازم يركب الصعب

و هنعمل ايه ف دنيا ...ناسها مش عايزه تفوق

فاكرينها هاتحلى و تروووق

و آآه....يا دلعك يا شروق

اتوبيس 4 ..اتوبيس الهنا!!

النهارده كان عندى مشوار فى روكسى و اتفقت مع شيماء انى اروح معاها لما ترجع من الجامعه, و فعلا اتقابلنا و ركبنا اتوبيس 4 و الحمد لله كان معايا 10 قروش فكه(اصل الاجره الموحده هى جنيه و عشر قروش), ووصلنا هناك و عملت المشوار بتاعىو بعدين اضطريت انى اروح لوحدى لأن شيماء خدت مواصلات اسهل توصلها لبيتها(نداله بقه )
ووقفت ف الموقف فى روكسى حوالى تلت ساعه و بعدين اتوبيس 4 وصل بالسلامه الى ارض المعركه(قصدى المحطه)و ركبت و قعدت مستنيه حوالى تلت ساعه كمان لان السواق كان مزاجه مش رايق للسواقه(حقه طبعا ),
ووصل السواق بسلامة الله الى ارض الوطن( قصدى ارض المينى باص)و ونفضل بقبول فائق الاحترام و جمع الاجره, و دورت فى شنطتى كتير جدا بس للأسف ملقتش 10 قروش فكه( و حدثت الكارثه) و قلت هاتحمل الموقف و عواقبه و هادفع للسواق جنيه و نص و توكلت على الله.
و جمع السواق الاجره و تحرك بالمينى باص و انا طبعا كده ليا باقى 40 قرش(أصل عندى عرق منوفى) و فى واحده ورايا لها باقى 3 جنيه, و كنت على وشك انى اتخلى عن الباقى ك تبرع اجبارى(زى بتاع الجامعه) لمصلحة وسائل المواصلات لكن مبدأى الانتحارى منعنى انى اتخلى عن حقى الشرعى فى المطالبه بالباقى فهذه حريتى و يجب عليا عدم الرضوخ للاستعمار الدولى (قصدى الوطنى) .......كفايه كده
و بالفعل قتحت فمى و قلت للسواق:
انا ليا 40 قرش باقى(و كأن سحليه قرعه عضت ودن السواق)
التفت و نظر الى شزرا ( اعتقد ان النظره دى هى اللى بيقولوا انها شزرا)
و بص لى من فوق لتحت و قال بصوت جهورى:
ليكى كام.......40 قرش0 كان خلاص هايقولى يا شحاته)
و بعض من الناس المشكورين بصولى بنظرة اشفاق و تعالي زى ما يكونوا بيقولوا يا مسكينه يا غلبانه يالى عايزه الباقى.
و انا بقى و لا همنى....حسيت انى بدافع عن حق من حقوقى..و اخدت ال 40 قرش, و تقريبا موقفى شجع السيده اللى لها 3 جنيه و اصرت ان السواق يديهوملها...لكن السواق قالها ان مفيش باقى و تاخدهم و هى نازله!!!!!!!!.
ووصلنا عند جامعة عين شمس 0تقريبا ده اتوبيس نص الدنيا) وركب مجموعه من الشباب اللى مش عاجبهم حال البلد(اخص عليهم!!), وازدحم المينى باص بشكل غير عادى لدرجة انى حسيت ان فى 6 قاعدين على رجلى.
فى العباسيه ركب المفتش بتاع التذاكر, وطبعا على ما دخل المينى باص كانت حصلت مشاحنات غير عاديه(ناس ذوق وصايمين), و لما دخل وسط الناس جوه قال جمله خرمت ودانى:
ما توسعووووووووووووا كده...ايه الحريم اللى واقفه دى و الدنيا صياااااااااام.( لا تعليق)
المهم....أول ما وصلنا باب اللوق انطلق الطوفان..للخارج ( الحمد لله), و نزل نص الناس الللى ف المينى باص ...و هدأت العاصفه(قليلا), لان فى واحده قعدت جنبى رغايه و مش بتسكت ابدا...بس بلاش نتكلم كتير عليها عشان منبقاش رغايين زيها.
ووصلت الحمد لله الى ارض قريبه من منزلى حبيبى
اه...السيده اللى كان لها 3 جنيه, كانت لسه بتتحايل على السواق يديهملها و انا نازله( اتمنى انها تكون خدتهم)
و دى كانت مغامرة يوم مع مواصلات الحكومه .....و الزياده ال 10 قرووووووووش.