عندي صبية بنت 16... حلوة وليها دلال
من يوم ما توبها كساها داير وراها شباب ورجال
ترفض وتتأمر عليهم وحجتها ... " لسه مجاش ابن الحلال "
ف يوم اخدها جمالها ، قالت " هاخد التاجر الرحال"
قلتلها يا بنتي الحياة مش جاه ولا مال
نفشت طاوسها وردت " انا حلوة... والحلو يتقدر بمال وجمال "
ركبت دماغها ولبست دبلته
عرفت عيوبه وسدت ودانها وقلبها عن عملته
خدها ف ايده والكل جنبيهم يزغرد وعنين شباب الحارة فيها مليون سؤال
طلعت معاه بيته ومن يومها ماشفنالها لا خلخال ولا شال
ف الليل ووسط الضلمة تسمع م المشربية بكاها
والصبح ببقى انا قاعدة... احكي الحكاية وأعيد وازيد ف غناها
كانت عندي صبية بنت 16 حلوة وليها دلال
صبحت من الهم محنية، وكتبت م البكا موال
الصورة بعدسة الفنان: أحمد عبد الوهـاب
8 comments:
انا دخلت فين
المشربيه
والصبيه
ولا ست الحسن
ولا الشاطر حسن
اول زياره ليا
بس مش هتكون الاخيره
عرفت فيها الصبيه
وبكاها م المشربيه
وانكسرت الاميره
علشان دى شافت بعينها
مشفتش دا بقلبها
بس هيجى الشاطر
اللى هيمسح دموعها
علشان القلب صافى
ويفرح يوم رجوعها
:) تنور ف اي وقت
انا عايشه على الحدوته دى ونص مدونتى عنه
بجد مقتنعه تمام ان فى الشاطر حسن
وفى ست الحسن والجمال
مش بعيد عنى ولا انا بعيد عنه
ومسيرنا نتقابل
مدونتك عجبانى موووووووووت
انا جيت هنا صدفه
هاجيلك تانى
منورة يا واحدة من الناس :)
وشكرا على كلامك الجميل
عندما تتحدث الاستاذة فكلنا اذان صاغية
روعة يا مرمر
بهديكم بوكيه من الورورد على أنغام أحلى عود ودايما العيد عليكم يعود كل سنة وانتم دايما بخير
عيد سعيد على كل الناس الطيبين
بحب جدا الاسلوب دة فى الكتابه
:) اعجبتنى جدا
وبتناقش برضه قضيه مهمه
Post a Comment